Heart Touching Stories

 ایک بادشاہ تھا، جس کی چار بیویاں تھیں۔

وہ چوتھی بیوی سے بے حد محبت کرتا تھا اور اس کی ہر خواہش پوری کرتا تھا۔

تیسری بیوی سے بھی محبت کرتا تھا، لیکن اسے ڈر تھا کہ وہ کسی دن اُسے چھوڑ کر کسی اور کے پاس چلی جائے گی۔

دوسری بیوی وہ تھی جس کے پاس وہ ہر مشکل میں جاتا تھا، وہ ہمیشہ اس کا ساتھ دیتی اور دلاسہ دیتی تھی۔

مگر پہلی بیوی کو وہ نظر انداز کرتا تھا، اس کا خیال نہیں رکھتا تھا، حالانکہ وہ اُس سے بہت محبت کرتی تھی اور اس کی سلطنت کو سنبھالنے میں اس کا بہت بڑا کردار تھا۔

جب بادشاہ بیمار ہوا اور اسے اپنے آخری وقت کا احساس ہوا تو اُس نے سوچا:

"میری چار بیویاں ہیں، اور میں نہیں چاہتا کہ میں تنہا اپنی آخری منزل (قبر) کی طرف جاؤں۔"

اس نے چوتھی بیوی کو بلایا اور کہا:

"میں نے تم سے سب سے زیادہ محبت کی، تمہاری ہر خواہش پوری کی، کیا تم میرے ساتھ قبر میں چلو گی؟"

چوتھی بیوی بولی: "ناممکن!" اور فوراً چلی گئی، بغیر کسی ہمدردی کے۔

پھر بادشاہ نے تیسری بیوی کو بلایا اور کہا:

"میں نے تمہیں اپنی ساری زندگی چاہا، کیا تم میرے ساتھ چلو گی؟"

اس نے کہا: "بالکل نہیں، زندگی بہت خوبصورت ہے، تمہارے جانے کے بعد میں کسی اور سے شادی کر لوں گی۔"

پھر اس نے دوسری بیوی کو بلایا اور کہا:

"میں ہمیشہ مشکل وقت میں تمہارے پاس آیا، تم نے میرا ساتھ دیا، کیا تم میرے ساتھ قبر تک چلو گی؟"

تو دوسری بیوی بولی:

"معذرت، میں تمہیں صرف قبر تک چھوڑ سکتی ہوں، اس کے بعد مجھے واپس جانا ہوگا۔"

بادشاہ یہ سن کر بہت افسردہ ہوا، اتنے میں ایک آواز آئی:

"میں تمہارے ساتھ چلوں گی... میں تمہیں کبھی تنہا نہیں چھوڑوں گی۔"

بادشاہ نے مڑ کر دیکھا تو وہ پہلی بیوی تھی — کمزور، دُبلی، اور ناتواں۔

بادشاہ کی آنکھوں میں آنسو آ گئے، اور وہ کہنے لگا:

"کاش! میں نے تمہارا خیال رکھا ہوتا، جب وقت تھا۔"

---کہانی سے سبق:

ہم سب کی "چار بیویاں" ہوتی ہیں:

1. چوتھی بیوی:

ہماری دولت اور مال و اسباب ہے —

جو ہمیں چھوڑ جاتی ہے۔

2. تیسری بیوی:

ہماری شہرت، عہدہ، اور ظاہری شان و شوکت ہے —

جو دوسروں کو مل جاتی ہے۔

3. دوسری بیوی:

ہمارے رشتہ دار اور دوست —

جو صرف قبر تک ساتھ آتے ہیں۔

4. پہلی بیوی:

ہماری روح اور نیکیاں—

جو واقعی ہمارے ساتھ جاتی ہیں، مگر ہم اُسے اکثر نظرانداز کرتے ہیں۔

لہٰذا اصل سرمایہ وہ نیکیاں ہیں جن کا ساتھ ہمارے بعد بھی قائم رہتا ہے۔